«Ձեր ստարտը հուսադրող էր». Արամ Մանուկյանը՝ վարչապետին
«Պարոն վարչապետ, Ձեր ստարտը հուսադրող էր, հատկապես ադիոզ դեմքերից ազատվելու, ամենակոռումպացված դեմքերից ազատվելու համար, և Դուք դժվար սկիզբ կունենաք, եթե այդ բարձրացված նշաձողը չպահեք»,- այսօր Ազգային ժողովում կառավարության ծրագրի քննարկման ժամանակ հայտարարեց ՀԱԿ խմբակցության քարտուղար Արամ Մանուկյանը։
Նրա խոսքով՝ այն բազան, պլատֆորմը, որից վարչապետը սկսել է, շատ խախուտ, անհուսալի է.
«Ձեր ծրագրի և ելույթի թերություններից մեկը դա է, որ դուք անալիզ չեք արել, չեք ներկայացրել այն բազան, որի մեջ այսօր գտնվում է տնտեսությունը՝ կապիտալի արագ արտահոսք, բիզնեսի արտահոսք, մարդկային կապիտալի արտահոսք»։
Ա. Մանուկյանն ընդգծեց, որ, եթե մենք չենք ուզում նայել հնին, նրանց ձախողումներին և պատճառներին, հաջողություններ չենք կարող ունենալ.
«Պատասխանատուն տվյալ դեպքում վարչապետը չէ, այլ այն ուժը, որը պատասխանատվություն է ստանձնում այդ կառավարության համար»։
Ա. Մանուկյանը մեջբերումներ արեց Սերժ Սարգսյանի և Հովիկ Աբրահամյանի ծրագրային ելույթներից՝ ցույց տալով, որ ծրագրերում գրված դրույթները չեն իրագործվել։
Անդրադառնալով Կ. Կարապետյանի ծրագրին՝ Ա. Մանուկյանն ասաց.
«Բառերի կույտեր՝ ինչքան ուզեք՝ աջակցել, բարելավել… Հատկապես 6 ամսվա ծրագիրն այդպես չի կարող լինել։ Ծրագրի մեջ կան կետեր, որոնք բյուջեով նախատեսված չեն։ Ձեր ծրագրի մեջ մի քիչ կոմունիզմի հոտ է գալիս, երբ ասում եք՝ պետծառայողի կերպարի վերափոխում, մաքսային և հարկային աշխատողների կերպարի վերափոխում»։
Ելույթի վերջում Ա. Մանուկյանը խորհուրդ տվեց Կ. Կարապետյանին՝ ուշադիր լինել, որովհետև «նախորդ վարչապետները հիմնականում ձախողվել են իրենց թիմակիցների պատճառով»։
