«2016թ. մայիսի վերջից իրավիճակը ԼՂ հակամարտ զորքերի շփման գծում եղել է հարաբերականորեն կայուն». Անջեյ Կասպրշիկ

ԵԱՀԿ գործող նախագահի անձնական ներկայացուցիչ Անջեյ Կասպրշիկը Azernews-ին տված հարցազրույցում հայտարարել է, որ տարբեր երկրների բարձրաստիճան քաղաքական ղեկավարներն աջակցում են ԵԱՀԿ Մինսկի խմբի գործունեությանը։ Այս մասին հայտնում է ադրբեջանական Trend գործակալությունը։

Նրա խոսքով՝ ԵԱՀԿ Մինսկի խմբի համանախագահները մշտապես տեղյակ են Լեռնային Ղարաբաղի հակամարտության շուրջ իրադարձությունների զարգացման մանրամասներից և ամեն օր զբաղվում են այդ հարցով։

«ԵԱՀԿ նախագահությունը մշտական ուշադրություն է հատկացնում հակամարտությանը, ինչպես նաև տեղյակ է հակամարտության շուրջ զարգացումներից։ ԵԱՀԿ գործող նախագահ Ֆրանկ-Վալտեր Շտայնմայերն այցելել է տարածաշրջան, և այցի օրակարգում առաջին հերթին եղել է Լեռնային Ղարաբաղի հակամարտության կարգավորման հարցը»,- հայտարարել է դիվանագետը։

Նրա խոսքով՝ ԼՂ հակամարտության լուծումը քննարկման առարկա է նաև տարբեր միջազգային միջոցառումների ժամանակ։

Հենվելով ԵԱՀԿ-ից ստացված տեղեկության վրա՝ նա ասել է, որ 2016թ. մայիսի վերջից իրավիճակը հակամարտ զորքերի շփման գծում եղել է հարաբերականորեն կայուն, թեև նախկինի պես հաղորդվել են հրադադարի դեպքերի խախտման ու կորուստների մասին։
«Յուրաքանչյուր դժբախտ դեպք ողբերգություն է և ցավ ընտանիքի և հանգուցյալի ընկերների համար։ Ես կիսում եմ այդ վիշտը»,- ասել է Անջեյ Կասպրշիկը։
«Ցանկանում եմ ընդգծել, որ շփման գծում անցկացվող մոնիթորինգները որևէ հետազոտություն կամ խաղաղապահ ակտ չեն, մոնիթորինգները միայն տեղեկատվություն են տալիս գործերի ընդհանուր վիճակի մասին։ Մենք կշարունակենք դրանք»,- հավելել է նա։
Կասպրշիկը նաև ասել է, որ ԵԱՀԿ գործող նախագահի անձնական ներկայացուցչի գրասենյակի ընդլայնումը չի առնչվի իր մանդատին ու իր բուն գրասենյակի գործունեությանը։