Պետական ապարատում կառավարությունն իրականացնելու է օպտիմալացման մի շարք ծրագրեր
ՀՀ կառավարության ծրագրի առաջնահերթություններից մեկն է լինելու պետական կառավարման համակարգի օպտիմալացումը: Այդ նպատակով գործադիրը նախատեսում է արդյունավետ կառավարման համար ավելացնել կառավարության անդամների պաշտոնական լիազորությունները և դրան համարժեք սահմանել հանրային-իրավական պատասխանատվություն: Առկա մարտահրավերների համատեքստում իրականացվելու է վարկային ծրագրերի արդյունավետության վերագնահատում և գերակայությունների սահմանում, պետական կառավարման մարմինների կողմից քաղաքացիներին և տնտեսավարող սուբյեկտներին կոռուպցիայից զերծ ծառայությունների մատուցման նպատակով ավելորդ ընթացակարգերի և օղակների վերհանում ու վերացում, առօրյա կյանքում նվազագույնի են հասցվելու պետական կառավարման մարմինների հետ անհարկի շփումները:
Ավելացվելու է նաև պետական կառավարման մարմինների հաշվետվողականությունն ու թափանցիկությունը, ինչպես նաև նրանց և քաղաքացիների ու տնտեսավարող սուբյեկտների միջև ստեղծվելու է արդյունավետ հետադարձ կապ: Կառավարության ծրագրով նախատեսվում է պետական կառավարման ապարատի ծախսերի կրճատում՝ հիմք ընդունելով իրականացվող գործառույթների անհրաժեշտությունն ու փաստացի իրականացումը, տեղի է ունենալու պետական կառավարման մարմիններում կրկնվող կամ անարդյունավետ գործառույթներից հրաժարում,քաղաքացիներին և ներդրողներին մատուցվող ծառայութ յունների որակը բարձրացնելու համար ընդլայնվելու են «մեկ պատուհանի» սկզբունքով մատուցվող ծառայությունների համակարգերը՝ օգտագործելով գոյություն ունեցող հարթակները և որպես ծառայություններ մատուցողներ, ներգրավելով նաև մասնավոր սուբյեկտներին:
Բոլոր հանրապետական գործադիր մարմինների համար սահմանվելու են կատարողականի առանցքային ցուցիչներ և ըստ դրանց վարկանշում, տարածքային կառավարման մարմինների գործունեության գնահատման նոր կարգ, ներդրվելու են հանրային ծառայողների մասնագիտական ունակությունների, ինչպես նաև աշխատանքային պարտականությունների կատարման աստիճանի գնահատման կատարողականության նոր չափանիշներ՝ հիմք ընդունելով պետական ծառայողի կերպարի արմատական վերափոխման հրամայականը:
2017 թվականին ներդրվելու է պետությանը պատկանող բաժնետոմսերով (բաժնեմասերով) առևտրային կազմակերպությունների մշտադիտանցման կենտրոնացված համակարգ, ինչպես նաև այդ կազմակերպությունների գործունեության գնահատման համար որոշակի՝ հաշվարկային ցուցանիշների համակարգ:
