«Ընտրական օրենսգրքում խմբագրական աշխատանքներ են արվելու». Գագիկ Ջհանգիրյան
«Ընտրությունների ոլորտում կատարվող խախտումների պատասխանատվության խստացում է նախատեսում այս նախագիծը, և ես դրան, բնականաբար, կողմ եմ, թեկուզ շատ դեպքերում այդ խախումների խստացումը պրակտիկայում կարող է որևէ բանի չհանգեցնել»,- այսօր ԱԺ-ում Ընտրական օրենսգրքի նախագծի քննարկման ժամանակ հայտարարեց ԱԺ ՀԱԿ խմբակցության պատգամավոր Գագիկ Ջհանգիրյանը։
Նրա խոսքով՝ սուտ հայտարարության մասին հոդվածը քաղաքական պայմանավորվածության արտացոլումն է. «Բայց այստեղ խնդիրը սխալ է ձևակերպված։ Մենք սա կվերանայենք։ Սուտ հայտարարության համար ՀՀ քրեական օրենսդրության մեջ երբեք չի եղել քրեական պատասխանատվություն, եղել է սուտ մատնության, ցուցմունքի, եզրակացություն տալու համար, բայց սուտ հայտարարության համար չի եղել։ Մենք նոր հոդված ենք ներմուծում»։
Գ. Ջհանգիրյանն ասաց, որ իրենք խմբագրական փոփոխություն են կատարելու նախագծի մեջ։
