«Թուրքիան ցանկանում է իսրայելական գազը միացնել «Հարավային գազային միջանցքին». Էրդողանի խորհրդական
Թուրքիան ցանկանում է «Հարավային գազային միջանցք» նախագծին միացնել իսրայելական գազի մատակարարումները, հայտարարել է Թուրքիայի նախագահի խորհրդական Ջեմիլ Էրտեմը թուրքական TRT Haber հեռուստաալիքին տված հարցազրույցում։
Նրա խոսքով՝ Թուրքիայի էներգետիկայի և բնական ռեսուրսների նախարար Բերաթ Ալբայրաքն այդ թեման քննարկել է երեկ՝ իսրայելցի իր գործընկերոջ հետ հանդիպմանը։
Էրտեմը նշել է, որ երկրների միջև էներգետիկ համաձայնագիրը կարող է կատալիզատոր դառնալ լուծելու խնդիրները Արևելյան Միջերկրածովյան տարածաշրջանում և Մերձավոր Արևելքում։
Նախօրեին Թուրքիայի էներգետիկայի և բնական ռեսուրսների նախարարը և Իսրայելի էներգետիկայի նախարար Յուվալ Շտայնիցը Ստամբուլում կայացած 23-րդ Համաշխարհային էներգետիկ կոնգրեսի շրջանակում քննարկել են երկու երկրների միջև գազատարի շինարարության հնարավորությունը։
Ներկայումս Իսրայելի բնական գազի ապացուցված պաշարները կազմում են 900 մլրդ խմ։
