ԱՄՆ-ը չեղյալ է հայտարարել Մյանմայի դեմ պատժամիջոցները
Միացյալ Նահանգները չեղյալ է հայտարարել Մյանմայի դեմ կիրառվող պատժամիջոցները, որոնք գործում էին գրեթե 20 տարի: Համապատասխան կարգադրությունը ստորագրել է ԱՄՆ նախագահ Բարաք Օբաման: Ինչպես հաղորդում է ՏԱՍՍը, այս մասին նշվում է Միացյալ Նահանգների ֆինանսների նախարարության կայքում հրապարակված
հաղորդագրության մեջ:
Պաշտոնական Վաշինգտոնը պատժամիջոցներ էր սկսել կիրառել 1997 թվականից: ԱՄՆ և Մյանմայի միջև հարաբերությունները վատացել էին այն բանից հետո, ինչ 1988 թվականին այդ երկրում իշխանությունն իրենց ձեռքն էին առել զինվորականները` ճնշելով ուսանողների ելույթները:
2015 թվականին Մյանմայում անցկացվել են ընտրություններ, որի արդյունքներով իշխանության են եկել նախկին ընդդիմադիր ուժերը: Հենց այս փաստն էլ նախապայմաններ էր ստեղծել ամերիկյան պատժամիջոցների վերացման համար:
