ԴԱԻՇ-ն ստեղծվել էր Իրանին հարվածելու նպատակով․ իրանցի գեներալ

Ահաբեկչական ԴԱԻՇ խմբավորումն ստեղծվել էր Իրանին հարվածելու նպատակով, այլ ոչ թե Սիրիայում պատերազմելու համար։ Այս մասին, ինչպես հայտնում է իրանական IRNA գործակալությունը, հայտարարել է Իրանի Իսլամական հեղափոխության պահապանների կորպուսի «Կուդս» ստորաբաժանման հրամանատար, գեներալ-մայոր Կասեմ Սուլեյմանին։

Սուլեյմանին այս մասին հայտարարել է Իրանի Իսլամական հեղափոխության պահապանների կորպուսի հրամանատարներից մեկի հիշատակին նվիրված արարողության ժամանակ, որն սպանվել էր Սիրիայում անցած տարի։

Նրա խոսքով՝ եթե չլինեին Իրանի գործադրած ջանքերը, ԴԱԻՇ-ը տարածաշրջանում կստեղծեր իր սեփական պետությունը։

Վերջին տարիներին Իրանի Իսլամական հեղափոխության պահապանների կորպուսի մի քանի անդամ է սպանվել Իրաքում և Սիրիայում՝ ԴԱԻՇ-ի դեմ պայքար մղելիս։