Ռուսաստանը Սիրիայում նորագույն հակահրթիռային համակարգ է տեղակայել. ԶԼՄ-ներ
Ռուսաստանը նորագույն SA-23 «Գլադիատոր» (համաձայն ռուսական դասակարգման՝ С-300ВМ «Անթեյ-2500») հակահրթիռային համակարգ է տեղակայել Սիրիայում։ Այս մասին հայտնում է ամերիկյան Fox News հեռուստաալիքը՝ վկայակոչելով ամերիկյան հետախուզությունում իր աղբյուրներին։
«Առաջին անգամ է, երբ Ռուսաստանը SA-23 «Գլադիատոր» համակարգ է տեղակայել իր սահմաններից դուրս»,- հեռուստաալիքը մեջբերում է պաշտոնյաներից մեկի խոսքերը, ով ծանոթ է հետախուզության տվյալներին։
Նրա խոսքով՝ հրթիռները և դրանց հետ կապված բաղադրիչները դեռ պատրաստ չեն կիրառության։
Ինչպես նշել են հետախուզության ներկայացուցիչները, դա ևս մեկ անգամ հաստատում է, որ Մոսկվան չի պատրաստվում դադարեցնել աջակցությունը Սիրիայի նախագահ Բաշար Ասադի ռեժիմին։
