Գատչինայում կայացել է հրամանատար Անդրանիկ Գրիգորյանի հիշատակի հանդիսություն
Սանկտ Պետերբուրգից ոչ հեռու գտնվող Գատչինա քաղաքի հասարակայնությունը հարգանքի տուրք մատուցեց Լենինգրադի պաշտպանության համար մղված մարտերում սխրանքներ գործած, զինվորական հետախուզական ջոկատի հրամանատար Անդրանիկ Գրիգորյանի հիշատակին: Սանկտ Պետերբուրգից «Արմենպրես»-ի թղթակիցը հաղորդում է, որ քաղաքի կենտրոնական փողոցներից մեկը այսօր կրում է մեր հայրենակցի անունը, իսկ հարևանությամբ գտնվող շենքի ճակատին փակցված է նրա դիմաքանդակը: Այստեղ էլ տեղի ունեցավ խիզախ հրամանատարի ծննդյան 110-ամյակին նվիրված հիշատակի հանդիսություն, որին ներկա էին նաև նրա որդին, հայ համանքի ներկայացուցիչները և այլք:
Անդրանիկ Գրիգորյանը մասնակցել է ֆինների դեմ մղված պատերազմին, այնուհետև քաղաքի մատույցներում հերոսաբար կռվել է երկիր ներխուժած ֆաշիստների դեմ: Շատ կարևոր հերթական մարտական առաջադրանքը կատարելուց հետո, հրամանատարը և նրա ջոկատի կենդանի մնացած հետախույզները, նահանջելիս անհավասար մարտի են բռնվում գերմանացիների հետ, որոնց էլ հաջողվում է նրանց գերի վերցնել: Ֆաշիստները սկզբում հրապարակավ կախաղան են բարձրաձնում Անդրանիկ Գրիգորյանին, ապա գնդակահարում են նրա մարտական ընկերներին:
Հայ հետախույզի լուսավոր կերպաը անմահացրել են «Արցունքներն աչքերին», փաստավավերագրական կինոնկարի հեղինակները (սցենարի հեղինակ՝ Յուրի Կարապետյան, ռեժիսոր Համլետ Հայրապետյան), որոնց հաջողվել է ճշմարտացի արտացոլել իրենց կինոպատմության յուրաքանչյուր հուզիչ տեսարանն ու դրվագը: Հավելենք նաև, որ անցած կիրակի օրը՝ սեպտեմբերի 18ին Սանկտ Պետերբուրգի Հայ Առաքելական Սբ Կատարինե եկեղեցու «Վերնատուն» մշակութային կենտրոնում ցուցադրվեց միջազգային կինոփառատոնի դիպլոմի արժանացած «Արցունքներն աչքերին» կինոնկարը, որն հանդիսատեսին հուզեց ու հպարտության զգացումներ առաջ բերեց:
