Մեծ Բրիտանիան հաստատել է մասնակցությունը Ասադի զորքերին հասցված հարվածներին
Մեծ Բրիտանիայի իշխանությունները ևս, հետևելով Դանիայի իշխանություններին, հաստատել են, որ իր ինքնաթիռները մասնակցել են Սիրայի տարածքին հասցված ավիահարվածներին, որոնց զոհ են դարձել Սիրիայի կառավարական բանակի տասնյակ զինծառայողներ, հայտնում է BBC-ն։
Մեծ Բրիտանիայի պաշտպանության նախարարության հաղորդագրության մեջ ասվում է, որ երկրի իշխանություններն ընդունում են ավիահարվածներին առնչությունը և մասնակցում են դեպքի հետաքննությանը։
«Մեծ Բրիտանիան կանխամտածված կերպով հարված չէր հասցնի սիրիացի զինվորականներին»,- ընդգծել են գերատեսչությունից։
Հիշեցնենք, որ ԱՄՆ-ի գլխավորած միջազգային կոալիցիայի ինքնաթիռները Դեր Զոր քաղաքի շրջանում նախօրեին հարվածներ էին հասցրել սիրիական բանակի դիրքերին:
Հարվածների հետևանքով սպանվել էր ավելի քան 80 սիրիացի զինվորական, մոտ 100 զինծառայող վնասվածքներ էր ստացել։
Սիրիացի զինվորականներին հասցված հարվածներից հետո ԱՄՆ-ը կասեցրել էր կոալիցիայի հարվածները Սիրիայում։ Պենտագոնը հայտարարել էր, թե մտադրություն չի ունեցել գրոհել սիրիական բանակի դիրքերը։
Ավելի վաղ Դանիան էր խոստովանել, որ մասնակցել է Սիրիայում Բաշար Ասադի զորքերին ԱՄՆ-ի գլխավորած կոալիցիայի հասցրած ավիահարվածներին։
