Նյու Ջերսիում ինքնաշեն ռումբեր են հայտնաբերվել
Ոստիկանությունը Նյու Ջերսի նահանգի Էլիզաբեթ քաղաքի կայարանամերձ հատվածներում հայտնաբերել է 5 ինքնաշեն պայթուցիկ սարքերով ուսապարկ, հայտնում են ամերիկյան լրատվամիջոցները։
Ինքնաշեն ռումբերից մեկը պայթել է ականազերծելու փորձի ժամանակ։ Սակրավորներն օգտագործել են հեռակառավարվող ռոբոտ, այնպես որ զոհեր և տուժածներ չկան։ Պայթյունը որոտացել է այն պահին, երբ ռոբոտը փորձել է կտրել լարերից մեկը։
Քաղաքապետ Քրիստիան Բոլուեյջը լրագրողներին հայտնել է, որ գուցե ուսապարկի տերը որոշել է դրանից ազատվել, երբ տեսել է ոստիկանությանը։
Նրա խոսքով՝ եթե բոլոր 5 ռումբերը միաժամանակ պայթեին մարդաշատ վայրում, զոհերի թիվը մեծ կլիներ։
NBC հեռուստաալիքը պնդում է, որ հայտնաբերված ռումբերը նման են Մանհեթենում պայթած ռումբին, սակայն դա պաշտոնապես չի հաստատվել։
