Մայր Թերեզան սրբերի շարքին կդասվի իր մահվան տարելիցի նախօրեին

Մայր Թերեզան, որն արտաքնապես հայտնի էր կապույտ գծերով սպիտակ զգեստով, «Գթասրտության օրդեն»-ի հիմնադիրն է, որի նպատակը Կոլկաթայում հիվանդներին և աղքատներին ծառայելն է եղել։ Հոգեւոր օրդեն, որը շուտով տարածվեց ամբողջ աշխարհում։

Մասնաճյուղերից մեկը գտնվում է Վաշինգտոնում։ Ինչպես այս հաստատության միանձնուհիներից քույր Նիշին է ասում, իրենք այստեղ աշխատանքներն իրականացնում են Մայր Թերեզայի սկզբունքներով։ Քույրերին օգնում են նաեւ մայրաքաղաքի կամավորները, որոնցից Հյուսթըն Ռոբերսոնի խոսքերով, մարդկանց պետք է գնահատել մյուսների նկատմամբ նրանց ցուցաբերած վերաբերմունքով։ Մայր Թերեզան, ասում են կամավորները, դժբախտ մարդկանց ձայնն էր, ձայն, որն այսօր էլ լսվում է նրա հիմնած հաստատություններում եւ այս կամավորների շուրթերից։

«Մայր Թերեզան ապրում է բոլորիս մեջ։ Նա մեզ ցույց է տվել, թե ինչպես պիտի ապրի քրիստոնյան։ Նա ընտրում էր ամենակարիքավորներին ու նրանց հետ վարվում արժանապատվությամբ։ Մենք նույնկերպ ենք շարունակում նրա ավանդը ու բոլորին ցուցաբերում արժանապատիվ մոտեցում»,- ըստ «Ամերիկայի ձայնի»՝ ասում են նրանք։

Հայաստանը նույնպես լավ է հիշում Մայր Թերեզային, որը 1988 թվականի երկրաշարժից մի քանի օր անց ժամանեց այստեղ ու աշխարհի ուշադրությունն ավելի սեւեռեց մի երկրի վրա, որն այնքան շատ էր այդ օրերին զգում աշխարհի օգնության կարիքը։

Հռոմի Հովհաննես Պողոս Երկրորդ Պապը 2003 թվականին նրան դասեց Կաթոլիկ եկեղեցում երանելիների շարքը, որը մինչեւ սրբադասում վերջին քայլն էր։ Այսօր սակայն կան տեսակետներ այն մասին, որ չնայած Մայր Թերազան արդեն իսկ սրբություն է միլիոնավոր մարդկանց համար, նա շատ մեծ տեղ է հատկացրել իր հաստատությունների ու կատարված աշխատանքների փառաբանման կարեւորությանը։

«Թող բոլորն անեն, ու բոլորն էլ փառաբանվեն»,- ասում են շատերը՝ դատապարտելով գթասրտության քրոջը քննադատողներին։

Սրբերի շարքին է դասվում Մայր Թերեզան, որը ինքն էր երբեմն նեղվում Աստծուց ու ասում. «Եթե նույնիսկ Քեզ չեմ զգում, հավատում եմ ես Քեզ շատ»։

Մի բան, որը կարող է օրինակ ծառայել բոլոր նրանց համար, ում ճակատագիրը ստիպում է նեղանալ ու երես թեքել Աստծուց։ «Եթե նույնիսկ Քեզ չեմ զգում, ուզում եմ հավատալ ես Դու կաս»։