«Եթե Նիկոլն այն ժամանակ իր հայրիկին ու մայրիկին լսած լիներ, իր կյանքի ուղին բավականին ճիշտ կգնար». Պարույր Հայրիկյանը՝ Նիկոլ Փաշինյանի մասին
ԱԻՄ առաջնորդ Պարույր Հայրիկյանն այսօր հրավիրված ասուլիսում անդրադառնալով ԱԺ պատգամավոր Նիկոլ Փաշինյանի վերջին օրերի ելույթներին` նշեց.
«Առաջին օրերին Նիկոլի պահվածքը շատ էի հավանում: Նիկոլը վերջում քննադատեց Լևոն Տեր-Պետրոսյանին, որին համարում էր իր քաղաքական ծնողը: Բայց նա ունի ուղղակի ծնողներ` իր հայրն ու մայրը: Երբ Նիկոլը երիտասարդ էր, մոտեցավ ինձ՝ որպես լրագրող, ու ասաց` «պարոն Հայրիկյան, հայրս ու մայրս Ձեզ են ընտրել»: Հարցրի` իսկ դո՞ւ: Ժպտաց… ենթադրում եմ, որ՝ Լևոն Տեր-Պետրոսյանին: Եթե այն ժամանակ իր հայրիկին ու մայրիկին լսած լիներ, իր կյանքի ուղին բավականին ճիշտ կգնար»:
Հիշեցնենք, որ օրեր առաջ ԱԺ պատգամավոր Նիկոլ Փաշինյանը Խորենացի փողոցում իր ելույթում ՀՀ առաջին նախագահ Լևոն Տեր-Պետրոսյանին մեղադրել էր ՀՀ նախագահ Սերժ Սարգսյանի հետ «դաշինք կազմելու» մեջ.
«Ես հիմա ցավալի արձանագրում եմ անելու, որովհետև Լևոն Տեր-Պետրոսյանը դաշինք է կազմել Սերժ Սարգսյանի հետ՝ Ղարաբաղի հարցում, այսպես կոչված, մի ծրագիր իրագործելու համար, որը դիվանագիտական շրջանակներում հայտնի է «լավրովյան պլան» անունով: Դա մի խայտառակ լուծում է ՀՀ-ի համար, և այդ լուծմանը համաձայնելն ամոթալի է ո՛չ միայն առաջին դեմքերի, այլև ՀՀ յուրաքանչյուր քաղաքացու համար: Ինչո՞ւ է Լևոն Տեր-Պետրոսյանը սա անում:
Բացի աշխարհայացքային, աշխարհաքաղաքական պատճառներից՝ այստեղ կա ևս մեկ կարևոր անձնական մոտիվ՝ Տեր-Պետրոսյանն ուզում է օգնել Սերժ Սարգսյանին ազատագրված տարածքները հանձնելու հարցում, որպեսզի, ի վերջո, կարողանա արձանագրել, որ ինքը 1996, 1997 թվականներին ճիշտ էր ասում: Բայց սա, նորից եմ ասում, ամոթալի մոտեցում է»,- ասել էր Փաշինյանը:
Պարույր Հայրիկյանի խոսքով՝ Նիկոլ Փաշինյանը սխալվեց ու իր դեմ տրամադրեց բոլորին, երբ հայտարարեց, որ իրենք միակ ընդդիմությունն են.
«Բայց չեմ կարծում, որ Փաշինյանը կամ որևէ մեկը մի սխալի համար արտամղվի: Ուրախ կլինեմ, որ Նիկոլն իր ներկայությամբ հարստացնի: Նրա նահանջը ծանր հարված էր: Չեմ կարծում, որ նա այդ հարվածը ծրագրել էր, չնայած՝ չեմ էլ բացառում»:
