Նազարբաևն ու Էրդողանը քննարկել են երկկողմ համագործակցության հարցեր
Ղազախստանի նախագահ Նուրսուլթան Նազարբաևը Թուրքիայի իր գործընկեր Ռեջեփ Էրդողանի հետ երեկ կայացած հեռախոսազրույցի ընթացքում քննարկել է երկու երկրների համագործակցության առաջնահերթ ուղղությունները, հայտնել է Նազարբաևի մամուլի ծառայությունը:
Մամլո ծառայությունից հայտնել են, որ երկու երկրների նախագահների հեռախոսազրույցը կայացել է թուրքական կողմի նախաձեռնությամբ, տեղեկացնում է RIA Novosti-ն:
«Հեռախոսազրույցի ընթացքում երկու երկրների ղեկավարները քննարկել են ղազախա-թուրքական համագործակցության առաջնային ուղղությունները, ինչպես նաև նախանշել են առևտրատնտեսական և ներդրումային ոլորտներում փոխգործակցության ակտիվացման ուղիները»,- ասվում է Ղազախստանի նախագահի պաշտոնական կայքում հրապարակված հաղորդագրության մեջ:
Էրդողանն ընդգծել է իր պատրաստակամությունը՝ շարունակել երկխոսությունն ու համատեղ աշխատանքը երկկողմ հարաբերությունների ընդլայնման ուղղությամբ:
