Քլինթոնը Թրամփին մեղադրել է հակասեմականության մեջ
ԱՄՆ նախագահի դեմոկրատ թեկնածու Հիլարի Քլինթոնը հայտարարել է, որ թվիթը, որը հրապարակել է իր մրցակից, հանրապետական Դոնալդ Թրամփը և որը պարունակում է վեցաթև աստղ, ակնհայտ հակասեմականության դրսևորում է, հայտնում է BBC-ն:
Թրամփի գրառումը պատկերել է Դավթի վեցաթև աստղը հիշեցնող պատկեր, ինչպես նաև դոլարի թղթադրամի ֆոն և հետևյալ գրառումը. «Ամենակոռումպացված թեկնածուն ողջ պատմության մեջ»:
Թրամփը հայտարարել է, որ ԶԼՄ-ները անբարեխիղճ կերպով համեմատում են իր հրապարակումը Դավթի աստղի հետ, որը հուդայականության խորհրդանիշներից է:
«Դոնալդ Թրամփի կողմից ակնհայտորեն հակասեմիթականություն պատկերող նկարի օգտագործումը, որը վերցված է ռասիստական կայքերից, ինքնին բավական անհանգստացնող երևույթ է: Այն փաստը, որ դա առաջին նման դեպքը չէ, պետք է լրջորեն անհանգստացնի ընտրողներին»,- ասվում է Քլինթոնի ընտրական շտաբի հայտարարության մեջ:
Թրամփը իր հերթին նման մեկնաբանությունը որակել է «պարզապես ծիծաղելի»:
