Թրամփը պարտված մրցակիցներին մեղադրել է իր դեմ խռովություն կազմակերպելու մեջ
Ամերիկացի միլիարդատեր Դոնալդ Թրամփը հայտարարել է, որ իր նախկին մրցակիցները, հիասթափված Հանրապետական կուսակցությունից ԱՄՆ նախագահի թեկնածու առաջադրվելու իր իրավունքից, վերջին ջանքերն են գործադրում, որ իրեն խանգարեն դառնալ պաշտոնական թեկնածու:
Ելույթ ունենալով Լաս Վեգասում, Թրամփը հիշատակել է «խռովարարների ինչ-որ խմբի մասին», որը, ինչպես նա է պնդում, կձգտի իրեն թողնել առանց հուլիսին կայանալիք կուսակցական համագումարի պատվիրակների ձայների:
«Կա մի քանի պարտված մարդ, ու նրանք պատրաստվում են պատվիրակների ինչ-որ խռովություն կազմակերպել: Կարծում եմ՝ նրանք արդեն դա հասցրել են անել»,- հայտարարել է Թրամփը:
Նա կոնկրետ անուններ չի նշել, սակայն սպառնացել է, որ եթե Հանրապետական կուսակցության անդամներն իր շուրջը չհամախմբվեն, ապա ինքը կդադարեցնի միջոցներ հավաքել հանրապետականների ընտրական արշավի համար և կզբաղվի իր քարոզարշավի ֆինանսավորմամբ:
Ելույթի ընթացքում, որը ունկնդրել է մի քանի հազար մարդ, Թրամփը մի քանի անգամ անդրադարձել է իր դեմ հյուսված դավադրությանը, հաղորդում է BBC-ն:
