«Իշխանությունը վերջապես հասկացավ, որ դատարկ խոստումներով գյումրեցիներին կերակրել հնարավոր չէ». Մարտուն Գրիգորյան
«Մեր գյումրեցիների համար պայքարի արդյունքում իշխանությունը վերջապես ընկալեց, հասկացավ, որ դատարկ խոստումներով գյումրեցիներին կերակրել հնարավոր չէ, գյումրեցիների ականջը շոյել հնարավոր չէ, որի համար շնորհակալ եմ: Դա վերաբերում է նաև մնացած քաղաքական ուժերին, որ դատարկ խոստումներով, կամ ընտրություններից ընտրություն ակտիվանալով, գյումրեցիների թասիբը, նամուսը, պատիվը հիշելով, կոչ անելով՝ չեն կարող գյումրեցիների ուշադրությունը շեղել: Գյումրեցիներն ամեն ինչ շատ լավ հասկանում են»,- այսօր ԱԺ արտահերթ նիստում «Գյումրու քաղաքային ճանապարհներ» վարկային համաձայնագրի քննարկման ժամանակ հայտարարեց ԲՀԿ-ական պատգամավոր Մարտուն Գրիգորյանը:
Նախագծով, հիշեցնենք, նախատեսվում է, որ Վերակառուցման և զարգացման եվրոպական բանկը 15 տարի ժամկետով Հայաստանին կտրամադրի 14.6 մլն դոլար գումարի չափով վարկ՝ Գյումրի քաղաքում անվտանգ երթևեկության կազմակերպման համար բարեկարգ փողոցներ և էներգախնայող արտաքին լուսավորության ցանց կառուցելու համար:
Մ.Գրիգորյանը նշեց, որ կիսում է մտահոգությունը՝ վարկերի և արտաքին պարտքի մեծանալու հետ կապված, բայց որպես գյումրեցի՝ կոչ արեց ընդունել նախագիծը: «Գյումրին հանրապետության երկրորդ քաղաքն է, բայց մինչ օրս` 28 տարի անց, Գյումրին ունի տնակային ավտոկայարան, որը հասկանալի է, էս ամեն ինչն անում ենք տուրիզմի համար, որ գրավիչ լինի Գյումրի քաղաքը, բայց համաձայնեք, որ յուրաքանչյուր տուրիստ, որ գալիս է Գյումրի, առաջինը թիթեղյա ավտոկայարանն է տեսնում»:
Պատգամավորի կարծիքով` 150-160 հազար դոլարով կարելի է կառուցել նորմալ, ներկայանալի ավտոկայարան:
