Հայաստանի եզդիներն այս տարի Մալաքե Թաուսը նշում են առանց երգ-երաժշտության
Հայաստանում ապրող եզդիները նշում են իրենց Նոր տարին՝ Մալաքե Թաուսը։ Տոնի կապակցությամբ մեծ միջոցառում է կազմակերպվել Ակնալիճ գյուղում, որին բացի Հայաստանի եզդիական համայնքից մասնակցել են նաև Գերմանիայից, Ռուսաստանից, Իրաքից, Սիրիայից և այլ երկրներից ժամանած հյուրեր։
Ավանդույթի համաձայն՝ եզդիները այդ օրը գիշերը հավաքվում են և մեծ շուքով նշում տոնը, կերուխում են կազմակերպում մինչև առավոտ՝ դիմավորելով մեծ հրեշտակապետին։ Նրանից եզդիները խնդրում են խաղաղություն, առատություն և լիություն ամբողջ աշխարհին ու եզդիական համայնքին։
Լայլաֆաթի գիշերը եզդիները վառում են 366 մոմ, ինչպես նաև օդ են բարձրացնում 41 օդապարիկ, որը խորհրդանշում է եզդիական կրոնի գլխավոր մարգարե Շիխադիին և նրա 40 ընկերներին։
Հայաստանում այս միջոցառումը երկրորդ անգամ է նշվում։ Միջոցառման կազմակերպիչների խոսքով, նախատեսվում էր շատ ավելի մեծ և շքեղ միջոցառում կազմակերպել, սակայն հաշվի առնելով ապրիլի սկզբին ղարաբաղա-ադրբեջանական սահմանին տեղի ունեցած դեպքերը և հարգելով զոհված հայ և եզդի զինծառայողների հիշատակը՝ որոշվել է այն անցկացնել առանց երգ-երաժշտության։ Այսինքն, կանցկացվեն միայն այն կրոնական ծեսերը, որոնք պարտադիր են։
Լուսանկարները՝ Գերման Ավագյանի
