«Նախնական տվյալներով՝ մեկ զինվորականի ձեռքերն են կտրված». Արծրուն Հովհաննիսյան
Երեկ Հանրային հեռուտաընկերության «Եռանկյունի» հարղոդաշարի եթերում ՀՀ պաշտպանության նախարարության մամուլի խոսնակ Արծրուն Հովհաննիսյանը հայտարարել է, որ նախնական տեղեկությունների համաձայն՝ զինվորականներից մեկի ձեռքերը կտրված են:
Հարցին՝ արդյոք ռազմական հանցագործությունների, վայրագությունների վերաբերյալ փաստերը պատրաստվո՞ւմ են ներկայացնել ԵԱՀԿ Մինսկի խմբի համանախագահներին (խոսքը վերաբերում է երեխայի սպանությանը, դիակների գլխատմանը, խաղաղ բնակչության ռմբակոծության մասին), Արծրուն Հովհաննիսյանը պատասխանել է.
«Միանշանակ, մենք հավաքել ենք նյութերը և դեռ շարունակում ենք հավաքել, որովհետև, ցավոք, այն առաջին հայտնաբերված դիակներից բացի, ինչպես պարզվում է՝ կամաց-կամաց, այլ դիակներ ևս կան, որոնց հետ նման հարցեր կան»:
Դիտարկմանը, որ տեղեկատվություն է տարածվել 3 հայ զինվորի գլխատման մասին, Արծրուն Հովհաննիսյանն արձագանքել է. «3, արդեն 4 խոսակցություն կա: Պետք է ստուգել այս ամեն ինչը: Եվ նախնական տվյալներով՝ մեկ զինվորականի նաև ձեռքերն են կտրված: Այս ամենը պետք է հավաքել, և հավաքում ենք այս պահին: Եվ ոչ միայն ԵԱՀԿ-ին: Իհարկե, մեր պետական մյուս ինստիտուտները ևս այս ուղղությամբ արդեն աշխատում են:
Համապատասխան փաթեթ կլինի և կներկայացվի համապատասխան ատյաններին: Ես կարծում եմ, որ սա պիտի մանրակրկիտ ուսումնասիրվի և համապատասխան իրավական գնահատական տրվի սրան: 21-րդ դարում կատարվում է հստակ ռազմական հանցագործություն, ընդ որում, ընդամենը 4-օրյա մարտական գործողությունների ընթացքում աննախադեպ քանակի»:
