«Թույլ չենք տա բանակցություններ վարել Նեյմարի հետ. նա կմնա «Բարսելոնայում»». Պեպ Մարիա Բարտոմեու
«Բարսելոնայի» ղեկավարությունը` ի դեմս ակումբի նախագահ Պեպ Մարիա Բարտոմեուի, հերթական անգամ հասկացրել է, որ ոչ մի դեպքում չի պատրաստվում տրանսֆերի հանել Նեյմարին: Ավելի վաղ իսպանական ԶԼՄ-ները հաղորդել էին, որ Բրազիլիայի հավաքականի ֆուտբոլիստին մտադիր է գնել «ՊՍԺ»-ն, քանի որ չի բացառվում շվեդ հարձակվող Զլատան Իբրահիմովիչի հեռացումն ակումբից:
«Եթե ինչ-որ մեկը ցանկանա հիմա բանակցություններ վարել Նեյմարի հետ, ապա մենք նրան դա թույլ չենք տա: Նեյմարը կշարունակի խաղալ «Բարսելոնայում»»,- Բարտոմեուի խոսքերն է մեջբերում AS-ը:
Կատալոնական ակումբի և Նեյմարի հոր հաճախակի հանդիպումների վերաբերյալ Բարտոմեուն ասել է.
«Մենք հանդիպում ենք Նեյմարի հոր հետ, քանի որ «Բարսելոնան» հետաքրքրություն է ցուցաբերում բրազիլացի ֆուտբոլիստների նկատմամբ: Սրանք հանդիպումներ են, որոնք կապ ունեն մարքետինգի և սելեկցիոն աշխատանքի հետ: Նեյմարի հայրը օգնում է մեզ գտնել տաղադավոր ֆուտբոլիստներ Բրազիլիայում»:
Պատրաստեց Անի Գաբուզյանը
