Ահաբեկչության դեմ պայքարում գլոբալ մոտեցում է անհրաժեշտ. Պան Գի Մուն
ՄԱԿ-ի գլխավոր քարտուղար Պան Գի Մունը կոչ է արել երկրներին միավորել ջանքերն ահաբեկչության դեմ պայքարում, ինչպես նաև մեծ ուշադրություն դարձնել ծայրահեղականության առաջացման նախադրյալներին: Համապատասխան հայտարարությամբ նա հանդես է եկել երեքշաբթի Թունիսում կայացած մամուլի ասուլիսի ժամանակ, տեղեկացնում է TASS-ը:
«Ահաբեկչությունը լուրջ սպառնալիք է ոչ միայն Լիբիայում և Թունիսում, այլև ողջ աշխարհում, ինչի մասին վկայում են վերջին օրերի իրադարձությունները Բելգիայում, Իրաքում և Պակիստանում: Մեզ հարկավոր է միասնական, գլոբալ մոտեցում, եթե ցանկանում ենք արդյունավետ կերպով պայքարել ահաբեկչության դեմ»,- ասել է Պան Գի Մունը՝ ընդգծելով «մարտնչող ծայրահեղականության դեմ նոր գլոբալ գործընկերության» ստեղծման անհրաժեշտությունը:
Վերջինս բարձր է գնահատել երկրների ջանքերը ԴԱԻՇ-ի դեմ պայքարում Սիրիայում և Իրաքում, սակայն նախազգուշացրել է, որ ռազմական միջոցառումները, անգամ անհրաժեշտն ու արդյունավետը, «չեն կարող վերջնականորեն լուծել» գոյություն ունեցող խնդիրը:
Նա հիշեցրել է, որ հունվարին ՄԱԿ-ի գլխավոր ասամբլեային է ներկայացրել ծայրահեղականության նախազգուշացման գործողությունների պլան: Նրա խոսքով՝ «հակաահաբեկչական միջոցառումները կարևոր են, սակայն ավելի կարևոր է կանխել ահաբեկչությունը՝ հայտնաբերելով դրա առաջացման նախանշաններն ու ձեռնարկելով պրոֆիլակտիկ միջոցառումներ»:
