Վիսկին ամենաշատը սիրում են ֆրանսիացիները
Ֆրանսիայում վիսկի ավելի շատ են խմում, քան աշխարհի ցանկացած այլ երկրում: Bonial ընկերության անցկացրած հարցման տվյալներով, հանրապետության յուրաքանչյուր բնակիչ տարեկան միջին հաշվով օգտագործում է 2,15 լիտր խմիչք: Այդ մասին հայտնել է The Times թերթը:
Երկրորդ տեղում հայտնվել է Ուրուգվայը՝ մեկ մարդու հաշվով տարեկան 1,8 լիտր, երրորդում՝ ԱՄՆ-ը (1,4 լիտր): Մեծ Բրիտանիան զբաղեցրել է միայն յոթերորդ տեղը (1,25 լիտր): Նրանից առաջ են անցել Ավստրալիան, Իսպանիան եւ Արաբական Միացյալ Էմիրությունները:
Ֆրանսիայի սպիրտային խմիչքների արտահանողների դաշնության տվյալներով՝ երկրում վաճառվող վիսկիի գրեթե 90 տոկոսը ներկրվում է Շոտլանդիայից: Սակայն այդ խմիչքի բարձր պահանջարի կապակցությամբ ոգելից խմիչքների տեղացի արտադրողները մտադիր են վերակողմնորոշել արտադրությունը: «15 տարվա ընթացքում աշխարհւմ լավագույնը կդառնա Ֆրանսիայի վիսկին: Մենք կկարողանանք այլեւս չպատճենել շոտլանդացիներին եւ կհաստատենք իսկական ֆրանսիական ոճը»,- վստահ են փորձագետները:
