Կիևում ցուցարարները Ռուսաստանի դեսպանատան վրա յոդով սրվակներ ու քարեր են նետել
Այսօր մի քանի հարյուր մարդ է դարձյալ հավաքվել Կիևում Ռուսաստանի Դաշնության դեպանության հարևանությամբ, նրանք շինության վրա քարեր ու յոդով սրվակներ են նետել, հայտնում է TASS-ը՝ հղում կատարելով Կիևում ՌԴ դեսպանության մամուլի քարտուղար Օլեգ Գրիշինին:
«Դեսպանության մոտ մոտ 200 մարդ է հավաքվել, նրանք շենքի ուղղությամբ են նետում քարեր ու լցնում յոդ»,- ասել է նա:
Ցուցարարներն արդեն երրորդ օրն է, ինչ պիկետ են անցկացնում՝ պահանջելով ազատել ուկրաինացի նախկին զինծառայող Նադեժդա Սավչենկոյին, ով Ռուսաստանում մեղադրվում է ռուս լրագրողների սպանության մեջ:
Ցուցարարների հետ ՌԴ դեսպանության մոտ է գնացել նաև Ռադայում «Բատկիվշչինա» խմբակցության ղեկավար Յուլյա Տիմոշենկոն:
Բողոքի ակցիաները շարունակվում են մարտի 6-ից: Այդ ժամանակ անհայտ անձինք բեյսբոլի մականներով վնասել էին ռուսական դիվանագիտական համարանիշներով ավտոմեքենաները, ծուխ արձակող նռնակներ նետել շենքի ուղղությամբ:
