«ՀՀ-ԵՄ երկար բանակցությունների փոխարեն կարելի է անմիջապես ստորագրության ներկայացնել Ասոցացման քաղաքական բաղադրիչը». Ղազինյան
«ՀՀ-ԵՄ բանակցությունները պատուհան են»,- «Եվրոպական հանձնաժողովը ՀՀ-ի հետ բանակցություններ սկսելու մանդատ է ստացել. ակնկալիքներ և հեռանկարներ» թեմայով քննարկման ժամանակ այս մասին ասաց Եվրոպական հետազոտությունների կենտրոնի ղեկավար Արթուր Ղազինյանը:
Նա բացատրեց, թե ինչ ասել է Եվրոպական հանձնաժողովը ստացավ մանդատ Հայաստանի հետ բանակցելու: Ըստ նրա՝ սա մեկնարկ է մի գործընթացի, սկիզբ է դրվում մի գործընթացի, որը պատուհան է ԵՄ-ՀՀ հարաբերություններում:
Սակայն, նրա համոզմամբ, իրադրության փոփոխությունը կարող է հանգեցնել դռների բացման կամ փակման, չգիտենք, թե բանակցությունների ավարտին ինչպիսի աշխարհաքաղաքական իրավիճակում կլինենք և կկարողանա՞նք ստորագրել համաձայնագիր, թե՞ ոչ: Ղազինյանի համոզմամբ՝ ՀՀ-ն իր ԵՏՄ անդամակցությամբ սահմանափակեց իր տնտեսական ինքնուրույնությունը, տարիֆային ինքնիշխանությունը, դա հանձնելով ԵՏՄ-ին:
«ՀՀ-ի պարագայում այս պահին երկար բանակցելու փոխարեն կարելի է անմիջապես ստորագրության ներկայացնել ԱՀ քաղաքական բաղադրիչը, այստեղ նոր բանակցելու բան չունենք, կարելի է շտկումներ մտցնել և այն ուղղակի ադապտացնել ներկայիս իրողություններին և անմիջապես ներկայացնել ստորագրել:
Տնտեսական հնարավորությունները խիստ սահմանափակ են: Կասկածում եմ, որ Հայաստանի միջոցով եվրոպական ապրանքը կմտնի ԵՏՄ տարածք: Եթե ՀՀ-ն որոշում է արտոնյալ տարիֆային քաղաքականություն վարել ԵՄ-ի հետ, պետք է համաձայնեցվի ԵՏՄ-ի հետ: Ֆորմալ առումով ԵՏՄ-ն ՌԴ-ն է, եթե համաձայնություն լինի քաղաքական մակարդակով, այդ թվում ապահովել Իրանի հետ արտոնյալ առևտրային ռեժիմ, դա ՀՀ-ի համար նոր, լուրջ հնարավորություն պետք է լինի, դրան պետք է ձգտել»,- ասաց Ղազինյանը:
