Հայ ինժեներները Սինգապուրի ջրի մաքրման համակարգ են մշակել
IT ոլորտում հայտնի՝ ավտոմատ, թեստավորման սարքավորումներ արտադրող և վիրտուալ գործիքավորման ծրագրեր մշակող National Instruments կորպորացիայի (ԱՄՆ) հայաստանյան մասնաճյուղի ինժեներները Սինգապուրի խմելու ջրի վերահսկողության՝ ախտազերծող, զտող, ամոնիակը և քլորը տարանջատող (և այլն) SCADA տեսակի համակարգ են ստեղծել:
Համակարգը տեղադրվել է Սինգապուրում՝ ջրազտման խոշորագույն սարքավորումներից մեկի վրա, որի վիրտուալ մոդելն օրերս ներկայացվեց «DigiTec 2015» հայաստանյան ամենամյա տեխնոլոգիական ցուցահանդեսի ժամանակ, որի կազմակերպիչն է Հայաստանի Ինֆորմացիոն տեխնոլոգիաների ձեռնարկությունների միությունը (UITE):
Ի դեպ, National Instruments-ի հայաստանյան գրասենյակն առաջարկում է հայեցակարգային լուծումներ աշխարհի տարբեր երկրների այնպիսի ճարտարագիտական ընկերությունների համար, որոնք արտադրանք և պատրաստի լուծումներ են մշակում տարբեր ոլորտների, այդ թվում՝ նաև ավիա-արդյունաբերության համար։
