Խոստացել է ոսկյա շղթա, վերցրել գումարը, սակայն տրամադրել ոսկի չհանդիսացող զարդ
ՀՀ քննչական կոմիտեի Երևան քաղաքի Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ խարդախությամբ խոշոր չափի գումար հափշտակելու դեպքի առթիվ, որի շրջանակներում միջոցներ են ձեռնարկվում՝ պարզելու առերևույթ հանցագործություն կատարած անձի ինքնությունը։
2015 թվականի սեպտեմբերի 6-ին քաղաքացուց ահազանգ է ստացվել, որ նույն օրը մի կին, չարաշահելով իր վստահությունը, ոսկյա շղթա վաճառելու պատրվակով իրենից ստացել է խոշոր չափի գումար, սակայն փոխարենն իրեն տվել ոսկի չհանդիսացող զարդ:
Դեպքի առթիվ հարուցվել է քրեական գործ՝ ՀՀ քրեական օրենսգրքի 178-րդ հոդվածի 1-ին մասով:
Նախաքննության ընթացքում գործով տուժող ճանաչված քաղաքացին ներկայացրել է ոմն Զեմֆիրային գումար տալու պահի տեսաձայնագրությունը պարունակող լազերային սկավառակ:
Քրեական գործով բազմակողմանի, օբյեկտիվ և լրիվ նախաքննության իրականացումն ապահովելու համար միջոցներ են ձեռնարկվում տեսագրությունում պատկերված անձին հայտնաբերելու ուղղությամբ։
Ովքեր ճանաչում են լուսանկարներում պատկերված անձին կամ որևէ տեղեկություն ունեն նրա ինքնության կամ գտնվելու վայրի մասին, խնդրում ենք հայտնել ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին կամ ոստիկանության մոտակա բաժին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
