Ռուսաստանն անում է հնարավոր ամեն ինչ` մոտեցնելու ԼՂ խնդրի հանգուցալուծումը. ՌԴ ԱԳՆ
APA գործակալության հաղորդմամբ՝ ՌԴ ԱԳՆ պաշտոնական ներկայացուցիչ Մարիա Զախարովան երեկ կայացած ավանդական ճեպազրույցի ժամանակ հայտարարել է, որ Ադրբեջանը Ռուսաստանի գործընկերն է ոչ միայն քաղաքական, այլև տնտեսական ու այլ ոլորտներում:
«Երկու երկրների միջև բարձր մակարդակով ընթանում է քաղաքական երկխոսություն: Բացի այդ՝ կապերը զարգանում են քաղաքական, տնտեսական, մարդասիրական ու այլ որոտներում»,- ասել է Զախարովան՝ պատասխանելով Вестника Кавказа-ի թղթակցի հարցին:
Նա հույս է հայտնել, որ հարաբերությունների այդ մակարդակը կպահպանվի ու կշարունակի զարգանալ:
Նա անդրադարձել է նաև Լեռնային Ղարաբաղի կոնֆլիկտի կարգավորման հարցին:
«Ինչ վերաբերում է Լեռնային Ղարաբաղի դրությանը, ապա ինչպես գիտեք, Ռուսաստանը ակտիվ կերպով ներգրավված է կարգավորման գործընթացում: Մենք բանակցային խաղաղ գործընթացի, կասեի, որ շատ պատասխանատու մասնակիցներ ենք: Այդ պատճառով մենք կանենք անհրաժեշտ ամեն ինչ՝ որքան հնարավոր է արագ մոտեցնելու Լեռնային Ղարաբաղի խնդրի հանգուցալուծումը»,- հայտարարել է ՌԴ ԱԳՆ պաշտոնական ներկայացուցիչը:
