Էդվարդ Նալբանդյանն ու Էլմար Մամեդյարովը կհանդիպեն Նյու Յորքում
ԵԱՀԿ Մինկսկի խմբի համանախագահները կկազմակերպեն Հայաստանի ու Ադրբեջանի արտգործնախարարների հանդիպումը ՄԱԿ-ի գլխավոր ասամբլեայի շրջանակում: Այս մասին հայտնել է Ադրբեջանում ԱՄՆ դեսպան Ռոբերտ Սեկուտան՝ մեկնաբանելով ԵԱՀԿ Մինսկի խմբի համանախագահների հետագա քայլերին վերաբերող հարցը, հայտնում է haqqin.az-ը:
Դեսպանի խոսքով՝ ՄԱԿ-ի գլխավոր ասամբլեայի շրջանակում կայանալիք հանդիպմանը միջնորդները երկու երկրների արտգործնախարարների հետ կքննարկեն այս տարեվերջին Հայաստանի ու Ադրբեջանի նախագահների հերթական հանդիպման անցկացման հնարավորությունը:
Մեկնաբանելով ԵԱՀԿ Մինսկի խմբի համանախագահների տարածաշրջան կայանալիք այցի մասին հարցը՝ Ադրբեջանում ԱՄՆ դեսպանը հայտարարել է, թե այն դեռ որոշված չէ, սակայն միջնորդները ծրագրում են տարածաշրջան այցելել աշնանը:
Տեղեկացնենք, որ ՄԱԿ-ի գլխավոր ասամբլեայի 70-րդ նստաշրջանը պաշտոնապես կմեկնարկի Նյու Յորքում սեպտեմբերի 15-ին:
