Հունաստանի փրկության պլանն «արդեն ձախողվել է». Յանիս Վարուֆակիս
Հունաստանի ֆինանսների նախկին նախարար Յանիս Վարուֆակիսը «ձախողման դատապարտված» է անվանել Եվրամիության պլանը՝ Հունաստանը դուրս բերել դեֆոլտից ու եվրոգոտուց դուրս գալուց:
BBC-ին տված հարցազրույցում Վարուֆակիսն ասել է, որ Հունաստանին պարտադրում են ընդունել այդ ծրագիրը, որը «պատմության մեջ կմտնի որպես մակրոտնտեսական ղեկավարման խոշորագույն ձախողում»:
«Այդ ծրագիրը դատապարտված է ձախողման՝ անկախ այն բանից, թե ով է այն իրականացնելու»,-ասել է հույն նախկին նախարարը:
Հարցին, թե որքան ժամանակ կպահանջի այդ ծրագիրը, Վարուֆակիսը պատասխանել է. «Այդ ծրագիրն արդեն տապալվել է»:
Յանիս Վարուֆակիսը հրաժարական էր ներկայացրել Հունաստանի հանրաքվեից հետո, որտեղ հույները քվեարկել էին կոշտ բարեփոխումների դեմ:
Երեկ երեկոյան պարզ դարձավ, որ Հունաստանի վարչապետ Ալեքսիս Ցիպրասն աշխատանքից ազատել է կառավարության ևս 10 անդամի, ովքեր դեմ էին քվեարկել վարկատուների հետ գործարքին:
