Ցուցարարները չնախատեսված նստացույց իրականցրեցին Մաշտոցի պողոտայում
Ինչպես արդեն տեղեկացրել ենք, քիչ առաջ Շարլ Ազնավուրի անվան հրապարակի մոտից մեկնարկեց «Ո՛չ թալանին» նախաձեռնության երթը՝ դեպի ՀՀ գլխավոր դատախազություն:
Երթի մասնակիցները Թումանյան փողոցով շարժվեցին դեպի Ազատության հրապարակ, այնուհետև՝ Մաշտոցի պողոտայի միջնամասում նստացույց իրակացրեցին: Նախաձեռնության անդամ Մաքսիմ Սարգսյանն ասաց, որ սա չնախատեսված նստացույց էր և իրենք կմնան այնքան, որքան նստացույց իրականցնողները պահանջեն:
Հիշեցնենք, որ նախաձեռնության 3 պահանջները հետևյալն են՝ չեղարկել նոր սակագինը, վերանայել հինը՝ նվազեցման միտումով և պատժել հունիսի 23-ին ու հուլիսի 6-ին ցուցարարների նկատմամբ բռնություն կիրառած ոստիկաններին: Այսօրվա երթին նրանք պահանջում են քրեական պատասխանատվության ենթարկել բոլոր այն անձանց, ովքեր «ապօրինի կերպով հարման են տվել և իրականացրել են հունիսի 23-ին Բաղրամյան պողոտայում նստացույցի մասնակիցների նկատմամբ բռնությունները»:
Լուսանկարները՝ Ռազմիկ Մարտիրոսյանի
