Հունաստանում բանկերը մեկ շաբաթով կփակվեն
Հունաստանի բանկերը այսօրվանից սկսած մեկ շաբաթով դադարեցնում են իրենց գործունեությունը դեֆոլտի ու եվրոգոտուց երկրի դուրս գալու մտավախությունների ֆոնին:
Իշխանությունները սահմանափակել են նաև բանկոմատներից կանխիկի դուրսբերման հնարավորությունը՝ մինչև օրական 60 եվրո: Ֆոնդային բորսան նույնպես կփակվի, հայտնում է BBC-ի ռուսական ծառայությունը:
Այս մասին որոշումը կայացվել է այն բանից հետո, երբ ԵԿԲ-ն որոշել է չավելացնել հունական բանկերին օգնության տրամադրման ծավալը:
Հունաստանի վարչապետ Ալեքսիս Ցիպրասը կոչ է արել երկրի բնակիչներին հանգստություն պահպանել ու հավաստիացրել է, որ բոլոր բանկային պահուստներին վտանգ չի սպառնում:
Մինչև հունիսի 30-ը Հունաստանը ԱՄՀ-ին պետք է վճարի 1,6 մլրդ եվրո կամ պետք է դեֆոլտ հայտարարի: Վերջին շաբաթներին հույները բանկից իրենց հաշվեհամարներից հանել են միլիարդավոր եվրոներ:
