Ուկրաինայում կոնֆլիկտի կողմերը հայտնում են Դոնեցկի մոտ ընթացող մարտերի մասին
Ուկրաինայի արևելքում կոնֆլիկտի կողմերն ու ականատեսները հայտնում են Մարյինկա քաղաքում՝ Դոնեցկից հարավ-արևմուտք ընթացող մարտերի մասին, հայտնում է BBC-ի ռուսական ծառայությունը:
Ուկրաինացի զինվորականների հաղորդմամբ՝ Մարյինկա շրջանում իրենց դիրքերը ենթարկվում են զանգվածային հրետանային գնդակոծության: Իր հերթին, ինքնահռչակ Դոնեցկի Ժողովրդական Հանրապետության ներկայացուցիչները հայտարարում են իրենց զինված զորամիավորումների առաջխաղացման մասին, սակայն հայտարարում են, որ պարզապես զբաղեցնում են ուկրաինացի զինվորականների լքած դիրքերը:
Ինչպես հայտնել է Ուկրաինայի նախագահի ադմինիստրացիայի «հակաահաբեկչական օպերացիաների» հարցով ներկայացուցիչ Անդրեյ Լիսենկոն, Դոնեցկի Ժողովրդական Հանրապետության զինված կողմնակիցները այսօր սկսել են ուժեղ կերպով գնդակոծել Դոնեցկի հարավ-արևմտյան շրջանները Մարյինկայի ու Կրասնոգորովկայի շրջանում:
Ըստ ուկրաինացի զինվորականների՝ կրակել են ծանր զինատեսակներից՝ տանկերից, ականանետերից ու հրանոթներից:
Լիսենկոյի խոսքով՝ հարձակումը տեղի է ունենում սահմանազատման ոչ մեծ հատվածում, այդ իսկ պատճառով չի կարելի խոսել լայնամասշտաբ հարձակումների մասին:
«Հակառակորդը փորձում է առաջ շարժվել: Ուկրաինացի զինծառայողները հետ են մղում բոլոր հարձակումները», հայտարարել է վերջինս Կիևում ճեպազրույցի ժամանակ:
