Հովիկ Աբրահամյան. «Պիտի մենք կրճատենք գործուղումները»
ՀՀ կառավարության այսօրվա նիստում ֆինանսների փոխնախարար Վախթանգ Միրումյանը ներկայացրեց նախագիծ, որով առաջարկվում է կատարել բյուջետային հատկացումների եռամսյակային վերբաշխում: Առաջարկվում է 60.0 մլն դրամով ավելացնել արտասահմանյան պաշտոնական գործուղումների գծով նախատեսված առաջին կիսամյակի գումարը` անփոփոխ թողնելով այդ ծրագրի գծով նախատեսված հատկացումների տարեկան գումարը: Վախթանգ Միրումյանի խոսքով՝ առաջարկը պայմանավորված է առաջին կիսամյակում նախատեսված ծախսերի լիարժեք կատարումն ապահովելու անհրաժեշտոթյամբ:
ՀՀ վարչապետ Հովիկ Աբրահամյանն արձագանքեց. «Առիթից օգտվելով՝ նաև ուզում եմ ասել, որ պիտի մենք կրճատենք գործուղումները: Իհարկե, քննարկենք, որոնք իրոք կարևոր են, պիտի անպայման գնան մեր պատվիրակությունները, բայց եթե կարևորությունն ավելի քիչ է, նվազ է, իմ կարծիքով՝ պիտի մենք մերժենք»:
