Սուրիկ Խաչատրյանը չի վախենում, որ իրեն կսպանեն
Սյունիքի մարզպետ Սուրիկ Խաչատրյանի դեմ մահափորձի օրերին մարզում լարվածություն կար, այժմ լարվածություն չկա: Այս մասին այսօր ԱԺ-ում լրագրողներին ասաց Սյունիքի փոխմարզպետ Վաչե Գրիգորյանը:
Նա հավաստիացրեց, թե տեղյակ չէ, թե ինչու Ս.Խաչատրյանը անձամբ չի եկել ԱԺ՝ բյուջեի կատարողականի քննարկումներին մասնակցելու, բայց նաև վստահեցրեց, թե Ս.Խաչատրյանը չի վախենում, որ կսպանեն իրեն:
Հարցին՝ Ս.Խաչատրյանն Սյունիքում թշնամիներ ունի՞, Վ.Գրիգորյանը հակադարձեց. «Ինչի՞ եք ինձ հարցնում, ես կարծում եմ՝ չունի, երկար տարիներ մարզպետն է: Սյունիքը նրա ծննդավայրն է, և ինքը այնտեղ իրեն զգում է ինչպես սյունեցին իր հայրենիքում: Թող վախենա նա, ով ունի վատ նկատառումներ»:
Փոխմարզպետը Ս.Խաչատրյանի հետ աշխատելը «պատիվ» է համարում: Նա «անտակտ» համարեց հարցը, թե կարող է մի օր էլ իրեն սպանեն կամ ծեծեն: Նա նաև նշեց, թե մարզպետի դիսերտացիան չի կարդացել, քանի որ պետական ծառայության մասին օրենքում չկա նման կետ, որ պետք է ծանոթ լինի մարզպետի դիսերտացիային, իսկ դա գիտական աշխատանք է, իսկ ինքը գիտնական չէ:
Վ.Գրիգորյանը չի կարծում, որ մարզպետարանն իր աշխատանքը լավ չի կատարում, որ հանցագործությունը, կրակոցները, ծեծը շատ են մարզում, այլ գտնում է, որ դա իրավապահների գործն է. «Մարզպետարանը մարզի յուրաքանչյուր դեպքի և հատկապես մարզի սոցիալ-տնտեսական զարգացման մասին պետք է մտածի և տվյալ մարզի ժողովրդի բարեկեցության մասին, որ հաջողությամբ անում է»:
Թե ինչպես պատահեց, որ Տավուշը մերժեց համայնքների խոշորացումը, իսկ Սյունիքն ընդունեց, Վ.Գրիգորյանը նշեց, որ Սյունիքում գործում է «Տաթևի վերածննդի» հիմնադրամը և դա խթան է հանդիսանում զբոսաշրջության համար և պետք է ընդլայնվեն այն ենթակառուցվածքները, որ կխթանեն զբոսաշրջությունը և այս խնդիրները լուծելն ավելի հեշտ է համատեղ ուժերով:
