Վրաերթի հետևանքով մահացել է մանկահասակ երեխա. հարուցվել է քրեական գործ
Երևան քաղաքի քննչական վարչությունում հարուցվել է քրեական գործ՝ մանկահասակ երեխային վրաերթի ենթարկելու դեպքի առթիվ։
2015թ. մայիսի 02-ին՝ ժամը 13:00-ի սահմաններում, վարորդ Դ.Մելիքյանն իր անձնական օգտագործման «Տոյոտա» մակնիշի ավտոմեքենայով Երևան քաղաքի Ազատության պողոտայի թիվ 2 և 4 շենքերի բակամիջյան ճանապարհին վրաերթի է ենթարկել մանկահասակ Ռոկկո Պետրոսյանին, որի հետևանքով ստացած մարմնական վնասվածքներից փոքրիկը մահացել է։
Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով։ Կատարվում է նախաքննություն:
Նախաքննության ընթացքում նշանակվել են դատաբժշկական, դատաավտոտեխնիկական, դատահետքաբանական, դատաքիմիական փորձաքննություններ:
Գրավոր հանձնարարություն է տրվել ՀՀ ոստիկանության համապատասխան ստորաբաժանումներին՝ դեպքին ականատես անձանց, ինչպես նաև՝ վրաերթի հնարավոր տեսագրությունը հայտնաբերելու ուղղությամբ միջոցառումներ ձեռնարկելու վերաբերյալ։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
