Արաբական երկրները հավանության են արժանացրել միասնական բանակ ստեղծելու նախագիծը
Բրիտանական Reuters լրատվական գործակալության փոխանցմամբ` արաբական երկրների արտգործնախարարները հավանության են արժանացրել միասնական բանակ ստեղծելու մասին բանաձևի նախագիծը: Այս մասին հայտնել է եգիպտական հեռուստատեսությունը:
Արտգործնախարարները դիմել են Արաբական պետությունների լիգայի (ԱՊԼ) գլխավոր քարտուղարին, որպեսզի մեկ ամսվա ընթացքում ձևավորվի միասնական բանակը: Բանակը նախատեսված կլինի ռազմական արագ միջամտության շնորհիվ անվտանգության սպառնալիքների դեմ պայքարի համար:
Ընդգծվում է, որ նախարարների հանդիպմանը նախորդել է Սաուդյան Արաբիայի կողմից Եմենում շիա ապստամբների դիրքերը ռմբակոծելը: Սաուդյան Արաբիային աջակցություն են հայտնել ԱՊԼ-ը, ԱՄՆ-ը, Մեծ Բրիտանիան, Ֆրանսիան, Թուրքիան, Սուդանը, Եգիպտոսը, Պարսից ծոցի գրեթե բոլոր միապետությունները:
Իրանն ու Ռուսաստանը դեմ են արտահայտվել դրան, իսկ Չինաստանն ու ԵՄ-ը մտահոգություն են հայտնել այդ կապակցությամբ և հակամարտող բոլոր կողմերին կոչ են արել հակասությունները կարգավորել խաղաղ ճանապարհով:
