Ավակովը դեմ է արտահայտվել օլիգարխների զինված թիկնազորներին
Ուկրաինական UNIAN լրատվական գործակալության փոխանցմամբ՝ Ուկրաինայի ներքին գործերի նախարար Արսեն Ավակովը հայտարարել է, որ անվտանգության ապահովման ընկերությունների կողմից մասնավոր հրաձգային զենք օգտագործելը կպատժվի օրենքին համապատասխան:
Ավակովն այս մասին գրել է Facebook սոցցանցի իր էջում: Նա հիշեցրել է, որ հասարակական վայրերում հրաձգային զենք կրելը թույլատրված է միայն պետական ուժային կառույցների աշխատակիցների համար.
«Ուկրաինայի օրենքներով անվտանգության ապահովման մասնավոր կառույցներից որևէ մեկն իրավասու չէ ունենալ հրաձգային զենք: Քաղաքների փողոցներով չեն շրջելու գործարարների ու քաղաքական գործիչների անձնական թիկնազորները՝ զինված հրաձգային զենքով:
Դա վերաբերում է բոլորին. թե՛ իրական հայրենասերներին, թե՛ կեղծ հայրենասերներին, թե՛ խոշոր գործարարներին ու օլիգարխներին: Բացառություն կարող է կազմել միայն պաշտոնական զինված թիկնազորը՝ հատկացված համապատասխան պետական ծառայության կողմից»:
