Օբաման սպառնացել է Նեթանյահուին
Բրիտանական Reuters լրատվական գործակալության փոխանցմամբ՝ ԱՄՆ նախագահ Բարաք Օբաման դժգոհություն է հայտնել Իսրայելի վարչապետ Բենիամին Նեթանյահուի հայտարարություններից և զգուշացրել է, որ Վաշինգտոնը կարող է վերանայել մերձավորարևելյան իր դաշնակցի հետ հարաբերությունները:
Օբաման իր այս դիրքորոշման մասին հեռախոսազրույցի ժամանակ իրազեկել է Իսրայելի վարչապետին: Ավելի վաղ՝ նախընտրական կամպանիայի ժամանակ, Նեթանյահուն հայտարարել էր, որ թույլ չի տա պաղեստինյան պետության ստեղծում, սակայն ավելի ուշ նա փոխել է իր դիրքորոշումը և հայտնել է, որ պատրաստ է ճանաչել այն:
Նեթանյահուն իր հայացքները բացատրում էր նրանով, որ Պաղեստինի ինքնավարությունը հրաժարվում է Իսրայելը ճանաչել որպես հրեա ժողովրդի հայրենիք, ինչպես նաև նրանով, որ Գազայի հատվածը շարունակում է վերահսկել ՀԱՄԱՍ արմատական խմբավորումը:
