Ուկրաինայի արևելքում ՄԱԿ-ի խաղաղապահների տեղակայումն անհրաժեշտ չէ. ՌԴ ԱԳՆ
Ռուսական Интерфакс լրատվական գործակալության փոխանցմամբ` Ռուսաստանի փոխարտգործնախարար Գենադի Գատիլովը հայտարարել է, որ Ուկրաինայի արևելքում չկա ՄԱԿ-ի հավելյալ կոնտինգենտի ծավալման անհրաժեշտություն.
«Մենք ելնում ենք նրանից, որ գոյություն ունեն մինսկյան պայմանավորվածություններ, որոնցում նշված է, որ մոնիթորինգի իրականացմամբ զբաղվելու է ԵԱՀԿ-ը»: Գատիլովը Դոնբաս խաղաղապահներ ուղարկելու հարցը համարել է բարդ.
«Պահանջվում է մանդատի, ուղարկվող կոնտինգենտի թվակազմի, նրանց ազգային կազմից համաձայնեցում, և բացի այդ, ամենագլխավոր առաջադրանքն այն է, թե ինչով են զբաղվելու նրանք»:
Ուկրաինան խաղաղապահների ծավալման հարցով ՄԱԿ-ին պաշտոնապես դիմել է երեկ: ՄԱԿ-ի կոնտինգենտի տեղակայման համար անհրաժեշտ է ՄԱԿ ԱԽ-ի անդամների, այդ թվում նաև Ռուսաստանի համաձայնությունը, ով ունի դրա վրա վետո կիրառելու իրավունք:
