Ռիգայում կայանալիք «Արևելյան գործընկերության» գագաթաժողովն ուղղված չէ որևէ մեկի դեմ. Մողերինի
Ռուսական РИА Новости լրատվական գործակալության փոխանցմամբ՝ մայիսին Ռիգայում կայանալիք «Արևելյան գործընկերության» գագաթաժողովն ուղղված չէ որևէ մեկի դեմ: Այս մասին այսօր Ռիգայում հայտարարել է ԵՄ-ի դիվանագիտության ղեկավար Ֆեդերիկա Մողերինին.
«Գագաթաժողովն անցկացվելու է ուկրաինական ճգնաժամի և դրան մեր պատասխանի համատեքստում»: Մողերինին ընդգծել է, որ ԵՏՄ-ն արդեն իսկ գործարկվել է, և ԵՄ-ի երկու գործընկերները՝ Հայաստանն ու Բելառուսը մտել են դրա մեջ.
«Ցանկանում եմ ընդգծել, որ գագաթաժողովը վերաբերվում է մեր գործընկերների հետ մեր հարաբերություններին, այն ուղղված չէ որևէ մեկի դեմ: Բլոկների, ազդեցության ոլորտների վրա հենված մտածելակերպը պատկանում է մեր պատմության ընդհանրապես այլ, ավելի մութ ժամանակաշրջանին: ԵՄ-ի հետ գործընկերությունը երբևէ չի լինի որևէ մեկի հետ թշնամանալու մասին հայտարարություն»:
