Թուրքիան անմիջականորեն չի մասնակցի Մոսուլի ռազմական գործողությանը. Դավութօղլու
Թուրքական Dünya Bülteni լրատվական կենտրոնի փոխանցմամբ՝ Թուրքիայի վարչապետ Ահմեթ Դավութօղլուն հայտարարել է, որ Թուրքիան կաջակցի «Իսլամական պետության» զինյալներից Մոսուլի ազատագրմանն ուղղված ԱՄՆ-ի գլխավորած միջազգային դաշինքի ռազմական գործողությանը, սակայն չի մասնակցի մարտերին.
«Թուրքիան չի մասնակցի Իրաքում ու Սիրիայում հակամարտության թեժ փուլերին: Մենք կօգնենք Մոսուլի հարցում, սակայն անմիջականորեն չենք մասնակցի մարտերին: Եթե ուղիղ հարձակման ենթարկվենք, ապա մենք կպատասխանենք անհապաղ: Մենք ունենք այդպիսի հնարավորություն:
Անկարան մեծ կարևորություն է տալիս Իրաքում իրավիճակի կարգավորմանը: Մենք շատ սերտ շփման մեջ ենք Իրաքի կենտրոնական իշխանությունների հետ և ցուցաբերում ենք տարբեր տիպի օգնություն: Մեզ համար կարևոր է նաև Իրաքի հյուսիսում գտնվող քրդական շրջանի կայունությունը:
Մեր բանակը ռազմական ուսուցում է տալիս Փեշմերգայի մարտիկներին: Մոսուլի պարագայում մենք վարում ենք սուննիների ու շիաների միջև բախումները կանխելու քաղաքականություն»:
