Ամերիկյան դատարանը Պաղեստինից պահանջել է 650 միլիոն դոլարի փոխհատուցում
Ամերիկյան The New York Times թերթի փոխանցմամբ՝ ԱՄՆ-ի Դաշնային դատարանը Պաղեստինի ազգային ինքնավարությանն ու Պաղեստինի ազատագրման կազմակերպությանը պարտավորեցրել է վճարել 650 միլիոն դոլարի փոխհատուցում՝ Իսրայելի տարածքում ահաբեկչություններ կազմակերպելու համար:
Դատարանն ընդունել է, որ պաղեստինյան կողմը մասնակցել է 6 հարձակման, որոնց հետևանքով զոհվել ու վիրավորվել են ԱՄՆ-ի քաղաքացիներ: Հայցվորների դերում հանդես են եկել 2002-2004 թվականներին զոհվածների 10 ընտանիքներ: Պաղեստինյան կողմը հայտարարել է, որ մտադիր է բողոքարկել դատարանի որոշումը:
Իսրայելի արտգործնախարար Ավիգդոր Լիբերմանը Facebook-ի իր էջում գրել է, որ դատարանի որոշումն առաջին հերթին Իսրայելի ու ահաբեկչության զոհերի բարոյական հաղթանակն է:
