Իրանն ու Ադրբեջանը կարող են միմյանց հետ առևտուր անել ազգային արժույթներով. իրանցի նախարար
Ադրբեջանական APA լրատվական գործակալության փոխանցմամբ՝ Իրանն ու Ադրբեջանը քննարկելու են առևտրային հարաբերություններում արժույթի ընտրության հարցը: Այս մասին Բաքվում կազմակերպված մամուլի ասուլիսի ժամանակ հայտարարել է Իրանի տնտեսական ու ֆինանսական հարցերով նախարար Ալի Թայեբնիան:
Նախարարն ընդգծել է, որ իր երկիրը հրաժարվել է ԱՄՆ-ի արժույթը գործածելուց և Իրանի ու Ադրբեջանի միջև առևտրային գործողություններում կարող է օգտագործվել ազգային արժույթը. «Մյուս երկրների հետ կոմերցիոն հարաբերություններում Իրանն օգտագործում է այդ երկրների արժույթը:
Մենք շահագրգռված ենք շարունակելու այդ փորձը: Այսօր մենք կհանդիպենք Ադրբեջանի Կենտրոնական բանկի նախագահի հետ: Այդ և փորձագետների հանդիպման ժամանակ քննարկվելու է բանկային ոլորտում համագործակցության ընդլայնումը: Հնարավոր է նաև երրորդ երկրների արժույթի կիրառումը»:
