Գերմանիայում կստեղծվի հետխորհրդային երկրների հետազոտման ինստիտուտ
Deutsche Welle-ի փոխանցմամբ՝ Գերմանիայի կառավարությունը մտադիր է ստեղծել Ռուսաստանի ու Արևելյան Եվրոպայի հետազոտման նոր ինստիտուտ: Իշխանությունների կարծիքով՝ երկրում բավարար չեն հետխորհրդային տիրույթի մասին գիտելիքները:
Այս մասին հայտարարել է Գերմանիայի արտգործնախարար Ֆրանկ Վալտեր Շտայնմայերը: Առաջիկա տարիներին Գերմանիայի ԱԳՆ-ը տարեկան 265 միլիոն եվրո կհատկացնի ինստիտուտի զարգացման համար, որի բացումը տեղի կունենա արդեն այս տարի:
Ինստիտուտի ստեղծման համար հիմք են ծառայել Ուկրաինայի ճգնաժամն ու Ղրիմի բռնակցումը, ինչպես նաև Գերմանիայի կառավարության մոտ ստեղծված այն տպավորությունը, որ Գերմանիայում հետխորհրդային երկրների քաղաքականության, տնտեսության ու հասարակության մասին առկա գիտելիքների մակարդակը չի համապատասխանում ժամանակի պահանջներին:
