Ներկայումս Ուկրաինայի արևելքում գտնվում է ավելի քան 9000 ռուս զինծառայող. Պորոշենկո
Deutsche Welle-ի փոխանցմամբ՝ Ուկրաինայի նախագահ Պյոտր Պորոշենկոն Դավոսում երեկ հայտարարել է, որ Ղրիմից բացի, օկուպացվել է Ուկրաինայի տարածքի 7 տոկոսը՝ Դոնեցկի ու Լուգանսկի մարզերում:
Պորոշենկոն հայտարարել է, որ ներկայումս Ուկրաինայի արևելքում գտնվում է ավելի քան 9000 ռուս զինծառայող, որոնք ռազմական գործողությունների են մասնակցում Դոնբասում՝ հանդես գալով ռուսամետ անջատողականների կողմից:
Պորոշենկոն հավելել է, որ նրանք զինված են ավելի քան 500 միավոր զրահատեխնիկայով, ծանր հրետանիով ու անձնակազմի փոխադրման մեքենաներով: Պորոշենկոն մանրամասնել է, որ դրանք հատուկ ծառայությունների տվյալներն են: Պորոշենկոն Ռուսաստանին կոչ է արել կատարել մինսկյան արձանագրությունը:
Նա միաժամանակ Արևմուտքին կոչ է արել աջակցել երկրին պաշտպանական ոլորտում: Նրա խոսքերով՝ Ուկրաինան որևէ մեկից չի պահանջում մահաբեր սպառազինություն, սակայն երկիրը կարիք ունի պաշտպանական տեխնոլոգիաների:
Պորոշենկոն խոստացել է, որ Ուկրաինան արդեն երկու տարի անց կարող է հաղթահարել Ռուսաստանից ունեցած էներգետիկ կախվածությունը. «Մոսկվան Ուկրաինան կկորցնի որպես բնական գազի վաճառքի շուկա»:
