Նավթ արտահանող երկիր Ադրբեջանը զգում է նավթի կտրուկ գնանկման հետևանքները. CESD

Ադրբեջանական Turan լրատվական գործակալության փոխանցմամբ՝ Սոցիալական ու տնտեսական զարգացման կենտրոնը (CESD) իր կայքում (cesd.az) հրապարակել է «Ադրբեջանական նավթի արտահանումը 2014 թվականին» հաշվետվությունը: Դրանում կանխատեսվում է, որ այս տարի 2014 թվականի նման կշարունակվի նավթի արդյունահանման տեմպի անկումը:

CESD-ն ընդգծում է, որ 2014 թվականն աչքի ընկավ համաշխարհային շուկայում նավթի հանկարծակի գնանկմամբ, և Ադրբեջանը՝ որպես նավթ արտահանող երկիր, սկսեց զգալ «սև ոսկու» վաճառքից ստացվող եկամուտների կտրուկ անկման հետևանքները:

Հաշվետվությունում նշված է, որ Ադրբեջանը նախկինի նման խստապես կախված է նավթի ու բնական գազի արտահանումից ստացվող եկամուտներից, թեև հնարավորություն ուներ շտկելու իրավիճակը:

2014 թվականի առաջին 11 ամիսներին Ադրբեջանի ապրանքաշրջանառության ծավալը կազմել է 36.7 միլիարդ դոլար, որից արտահանման ծավալը՝ 28.6 միլիարդ դոլար, իսկ ներկրումը՝ 8.1 միլիարդ դոլար:

Ոչ նավթային արտադրանքի արտահանումը կազմել է միայն 1.6 միլիարդ դոլար: Մեկ շնչին բաժին ընկնող ոչ նավթային արտադրանքի արտահանումը հավասար է 166.8 դոլարի: 2014 թվականի առաջին 11 ամիսներին նավթի ու նավթամթերքի մասնաբաժինը կազմել է 95.7 տոկոս:

2014 թվականին Ադրբեջանում արդյունահանվել է 41.9 միլիոն տոննա նավթ: Դա 3.7 տոկոսով զիջում է 2013 թվականի ցուցանիշին՝ 43.5 միլիոն տոննա նավթ: