Ֆրանսիայի իշխանություններն անվտանգության ապահովման համար մոբիլիզացնում են 88.000 ոստիկանի ու զինվորականի
BBC-ի փոխանցմամբ՝ Ֆրանսիայի կառավարությունը մոբիլիզացնում է իրավապահ մարմինների 88.000 աշխատակցի՝ Charlie Hebdo երգիծական պարբերականի գրասենյակի վրա կատարված հարձակումից հետո անվտանգությունն ապահովելու համար:
Դրա հետ կապված՝ խստացվել են ԶԼՄ-ների խմբագրատների, կրոնական ու պետական հիմնարկների, դպրոցների, կայարանների, օդանավակայանների, զբոսաշրջային վայրերի անվտանգության ապահովման միջոցառումները: Այս մասին հայտարարել է Ֆրանսիայի ներքին գործերի նախարար Բեռնար Կազնյովը:
Նրա խոսքերով՝ ֆրանսիական ոստիկանությունը ներկա դրությամբ ձերբակալել է 9 մարդու՝ կապված Charlie Hebdo-ի գրասենյակի վրա հարձակում ձեռնարկելու հետ: Հարձակման հետևանքով զոհվել էր 12 մարդ, այդ թվում նաև երկու ոստիկան:
