ՌԴ կառավարությունը քննարկում է նավթարդյունահանման ծավալի կրճատման հնարավորությունը
Ռուսական ТАСС լրատվական գործակալության փոխանցմամբ՝ Ռուսաստանի կառավարությունը դիտարկում է նավթարդյունահանման ծավալի կրճատման հնարավորությունը՝ նավթի գները պահպանելու համար:
Այս մասին լրագրողների հետ զրույցում հայտարարել է Ռուսաստանի էներգետիկայի նախարար Ալեքսանդր Նովակը: Նա մանրամասնել է, որ ներկա դրությամբ ընդունված չէ այդօրինակ որոշում. «Այդ հարցը պահանջում է մանրակրկիտ մշակում:
Մենք աշխատում ենք կառավարության ներսում՝ այդպիսի մեթոդների նպատակահարմարությունը պարզելու համար: Ռուսաստանի տեխնոլոգիաները տարբերվում են Սաուդյան Արաբիայի տեխնոլոգիաներից, ինչի համար էլ Ռուսաստանի համար բարդ է արագորեն նվազեցնել կամ մեծացնել նավթարդյունահանումը»:
Նոյեմբերի 27-ին Վիեննայում տեղի է ունենալու Նավթ արտահանող երկրների կազմակերպության (OPEC) կոնֆերանսը, որի ժամանակ ակնկալվում է նավթարդյունահանման քվոտաների փոփոխման մասին որոշման ընդունում:
