Արտերկրում Վրաստանի ավելի քան 10 դեսպաններ որոշել են լքել զբաղեցրած պաշտոնները
Новости-Грузия լրատվական գործակալության փոխանցմամբ՝ արտասահմանում Վրաստանի ավելի քան 10 (որոշակի տվյալներով՝ 12) դեսպաններ որոշել են լքել զբաղեցրած պաշտոնները: Դա տեղի է ունեցել այն բանից հետո, ինչ այսօր իր տեղակալների հետ միասին հրաժարական է տվել Վրաստանի արտգործնախարար Մայա Փանջիկիձեն:
Մասնավորապես, Փանջիկիձեից բացի, իրենց պաշտոններին հրաժեշտ են տալիս առաջին փոխարտգործնախարար Դավիթ Զալկալիանին, ինչպես նաև փոխարտգործնախարարներ Թամարա Բերուչաշվիլին, Վլադիմիր Գուրգենիձեն ու Դավիթ Ջալագանան, ով դեռ պաշտոնական այցով գտնվում է Կուբայում:
Վրաստանի ԱԳՆ-ի ղեկավարությունը որոշել է հրաժարական տալ այն բանից հետո, ինչ նախօրեին երկրի վարչապետ Իրակլի Գարիբաշվիլին պաշտոնանկ արեց պաշտպանության նախարար Իրակլի Ալասանիային: Վերջինիս տեղակալները նույնպես պաշտոնանկ են արվել:
