Մեր օրակարգում չկա հարց, թե ով է լինելու նախագահի հաջորդ թեկնածուն. «Ժառանգության» խոսնակ
«Ժառանգություն» կուսակցությունը նախագահական ընտրություններում որևէ մեկի թեկնածությունն առաջադրելու հարց չի քննարկել,- 168.am-ի հետ զրույցում տեղեկացրեց «Ժառանգության» մամուլի խոսնակ Դավիթ Սանասարյանը:
«Ես եռյակի խոսնակը չեմ, կարող եմ ասել «Ժառանգության» անունից` «Ժառանգությունը» նման հարց չի քննարկել: Մեր օրակարգում չկա հարց, թե ով է լինելու նախագահի հաջորդ թեկնածուն: Մեր օրակարգում առաջնային հարցն այս իշխանությունների հեռացումն է»,- նշեց նա:
Իսկ եթե, ի վերջո, պարզվի, որ հանրությունը հենց Գագիկ Ծառուկյանի կարիքն է զգում, ինչպես նա էր երեկ արտահայտվել, և Ծառուկյանը պիտի լինի նախագահի թեկնածու, այդ դեպքում «Ժառանգությունը» կպաշտպանի՞ նրա թեկնածությունը: Անդրադառնալով այս հարցին` Դավիթ Սանասարյանը շեշտեց, որ «եթե»-ներին չի պատասխանում.
«Կգա ժամանակը, երբ արդեն կքննարկվի հարցը, թե որ թեկնածուն կարող է ներկայացնել ընդդիմությանը, այդ ժամանակ, ի թիվս այլ մասնավոր թեկնածուների, կքննարկվեն բոլոր թեկնածուները, և կգանք ընդհանուր հայտարարի: Դա նշանակում է մեկնաբանել «եթե»-ով ինչ-որ հարց. եթե աշխարհը փուլ գա, ինչ կանի «Ժառանգությունը» և այլն, և այլն: Այս պարագայում չունենք նման իրավիճակ»:
Հիշեցնենք, որ «Բարգավաճ Հայաստան» կուսակցության նախագահ Գագիկ Ծառուկյանը, երեկվա ասուլիսում անդրադառնալով Հայաստանի նախագահի ընտրություններում իր հնարավոր առաջադրման մասին հարցին, ասել էր, թե իր մտքում կան չորսից հինգ թեկնածուների անուններ,ովքեր արժանապատիվ մարդիկ են և կարող են երկիրը զարգացման ուղու վրա դնել`միաժամանակ ավելացնելով. «Եթե իմ քաղաքական գործընկերները և հանրությունը նրանցից որևիցե մեկի թեկնածությունը կառաջադրի, ուրեմն՝ ես պատրաստ եմ նրան պաշտպանել, նրա կողքը կանգնել: Իսկ եթե իմ քաղաքական գործընկերները, հանրությունը ներկայացրեցին, որ ի՛մ կարիքը կա այդ ծանր, դժվար պահին, ու ի՛մ թեկնածությունը պետք է լինի, ուրեմն ես դրան էլ եմ պատրաստ»:
Ավելի ուշ Հայ ազգային կոնգրեսի խորհրդարանական խմբակցության քարտուղար Արամ Մանուկյանը «Ազատության» հետ զրույցում հայտարարել է, որ Ծառուկյանի առաջադրման հարցը եռյակում երբևէ չի քննարկվել:
